Entrevista Susana Rei:
Mulleres realizadoras, mulleres directoras, mulleres guionistas...
Iria Vázquez Estévez
Do total de películas realizadas no 2007 en Hollywood tan só o
7 % foron dirixidas por mulleres. Segundo Cima (Asociación de Mujeres
Cineastas y de Medios Audiovisuales) tan só o 9 % dos filmes producidos
no Estado español son dirixidos por unha muller; tamén no Estado,
en guión e produción as películas nas que participan mulleres
non acadan o 19 %. Son estas cifras as que xeran sorpresa cando descubrimos
que o premio á Mellor Curtametraxe Galega do Festival Curtocircuíto
(Santiago, 2007) ficase en mans dunha muller: Susana Rei, pola curta Cousas
do Kulechov. Esta curta é un enxeñoso falso documental no que
a utilización dunha aguda montaxe provoca que as imaxes gravadas durante
diferentes festas populares galegas e tamén diversas catástrofes
galegas (a explosión da Química Brenntag, afundimentos petroleiros,
incendios, presión inmobiliaria, desmantelamento industrial, etc.) poidan
converterse nunha ficticia invasión e guerra na Galiza. «De feito,
a curta ten unha segunda lectura que nos fala de nós e de colocarnos
como protagonistas dun conflito». Non é un documental intimista,
non hai unha heroína, non hai un drama, pero si unha mirada feminina.
Ademais deste premio, Cousas do Kulechov participou en diferentes certames e
festivais en Galiza, España ou América Latina recibindo Mención
de Honra na XXXIV Xornada Internacional do Cinema de Bahía (Brasil, 2007),
o Premio do Público en On&OF, Festival Creativo de Cortos (Ribadeo,
2007) ou o Premio Galicia do XXXV Certame Audiovisual Internacional Liceo Casino
Vilagarcía (Vilagarcía, 2007) e conseguindo recentemente o premio
Mestre Mateo á mellor obra experimental.
A: Moitas felicidades, imaxino que será esgotador pero moi emocionante?
SR: Grazas. Si, é moi gratificante ter unha resposta así tras
un traballo. Aínda máis cando se trata dunha proposta arriscada
da que non sabes o desenlace até o último día de montaxe.
Ademais, ter un Premio do Público (On&Of, 2007) entre os recoñecementos
confirma que a xente conectou coa técnica, coa estética e sobre
todo cos contidos e a reflexión que eu propuña en torno a manipulación
da información e a montaxe cinematográfica descubrindo a vileza
da trampa da montaxe da guerra.
A: Con respecto ás cifras que enunciamos ao inicio do artigo, da situación
na Galiza, non atopamos fontes, pero de seguro que a situación é
similar ou se cadra peor. Poderías describila un pouco dende a túa
perspectiva dentro do mundiño audiovisual?
SR: Ben, eu non che dou cifras, pero da experiencia de traballar dentro do
cine profesional, sobre todo en longametraxes, pódoche dicir que o cine
se estrutura cunha xerarquía semellante á do resto da sociedade.
As mulleres están case sempre situadas en postos como secretaria de produción,
anotadora, por suposto, perruquería, maquillaxe ou vestiario, etc. Como
vemos, traballos tradicionalmente asociados ás mulleres, sen que por
iso deixen de ser imprescindibles, pero xa non é tan doado ver mulleres
na dirección de fotografía, axudantes de dirección, dirección
de arte (aínda que en Galicia temos varios nomes destacados) e menos
aínda como realizadoras, quizais algo máis como guionistas.
Mais sempre hai excepcións, das catro longametraxes potentes nas que
traballei, dentro da equipa de arte, dúas, Isabel Coixet e Gracia Querejeta,
eran mulleres directoras. Pero o panorama segue estando moi cru.
A: O problema, ademais, á hora de buscar financiamento para proxectos
con iniciativa feminina, atópase tamén por dirixir sendo muller.
Existe un estudo moi interesante titulado La mujer y el cine, de Scott Cleverdon
e Assumpta Serna, no que se refiren a unha prolífica directora dos anos
corenta, Ida Lupino, quen se dirixía aos homes do seu equipo como se
ela fose a nai. Segundo Lupino, «a un home non lle dis, suxíreslle»
e utilizaba a súa técnica: «Queridos: mamá ten un
problema. Gostaría de facer isto, podedes? Sona imposible, seino, pero
poderiades facelo por mamá?». E eles ían e o facían.
Pode que funcionase nos corenta, non sei agora…
SR: Bo, é unha boa táctica, si señora. O problema é
que eu non aceito ben ter que buscar fórmulas para que a eles non lles
pareza rebaixante traballar ás ordes ou polas ideas dunha muller. Creo,
con todo, que nese desastre funcionan dúas cousas. Por un lado o orgullo
masculino ou, ás veces, o inconsciente colectivo e a forza do costume
que fai desa prepotencia algo normal, cando non teñen ningún problema
en arrastrarse tralo seu heroe futbolista, presentador de turno ou o que sexa.
Cando eu comezei temerariamente a inmiscirme en cotos privados para homes e
aparecía na localización armada coa miña bandoleira atravesada
por martelos e desaparafusadores, caixa de ferramentas e, por que non, serra
eléctrica e radial propias, os compañeiros pasaban os primeiros
días a pedirme: «oes, tráeme a lixa do dous», «Ei,
Susana, achégame o martelo» e así. Para eles eu só
podía estar alí en calidade de secretaria de ferramentas, supoño…
E se daba unha idea, sobre todo unha solución boa, enseguida se volatilizaba
no ar, facían como que non escoitaban… e logo sempre había
algún que a apresentaba como unha idea propia… Aceitaban mellor
que pintara, sobre todo se eran cadros ou graffitis…
E aí é onde vén a segunda parte do asunto, o machismo e
a desigualdade existen, non hai dúbida, daquela, a actitude é
fundamental. Lonxe de enfados ou mítines, eu facía o meu traballo,
e penso que o facía ben, o mellor que sabía. Non aceptaba o papel
que me querían impor, sentíame exactamente igual a eles e actuaba
en consecuencia.
Finalmente a situación normalizábase e cando no filme Los lunes
al sol, por poñer un exemplo, me tocou dirixir un grupo que traballaba
na pintura e nos decorados baixo a miña responsabilidade, todos estabamos
alí para conseguir sacar aquel asunto para adiante e todos, homes e mulleres,
respectaban as miñas decisións como responsable, non me criticaban
os erros ou alababan tontamente os acertos por ser muller, senón na xusta
medida na que acertaba ou erraba.
O mesmo acontece agora cando dirixo un proxecto, o normal é que termine
impóndose o que unha leva dentro, a firme convición de ser humano
igual ás demais persoas.
Non digo que non haxa problemas e desequilibrios no camiño. É
unha mágoa ter que gastar parte das nosas enerxías nesas trapalladas…
A: Fálase moito da existencia dun cine para mulleres feito por mulleres
(pasou coa literatura tamén) e moitos críticos de cine ou historiadores
pretenden poñer esa etiqueta a todas as películas feitas por unha
muller. É un xeito de diferenciación e sobre todo de exclusión
supoñendo así que as mulleres só poden facer cine para
mulleres e non bo cine ou cine en xeral. Cal é a túa posición
con respecto a esta etiqueta?
SR: Mira, un día fun presentar o Kulechov aquí en Galicia e proxectaban
unha curta de Lara Bacelos, unha de Juan Pablo Echeberri e a miña.
A de Lara e a miña tiñan moitísima forza e contundencia.
Diríamos que eran dúas temáticas, técnicas e estéticas
perfectamente encaixable no que o mundo máis conservador tacharía
de masculinas. Pola contra, a curta de Juan Pablo Echeverri era unha peza doce,
delicada e sutil, perfeitamente encaixable no que o mundo máis conservador
tacharía claramente de feminina.
Afortunadamente, nin todos os homes son uns brutos nin todas somos unhas amanteigadas
que se derreten polo amado…
Esas son opinións interesadas, olladas curtas e mesquiñas das
que hai que afastarse e, como resposta, facer o noso traballo.
A: Pero podemos considerar que existe un punto de vista ou unha perspectiva
propia das mulleres, a través da cal tal vez podamos facer visible a
nosa percepción do mundo?
SR: Claro que existe! Somos mulleres, nacemos como mulleres, crecemos como
mulleres e morremos como mulleres nun mundo que aínda marxina en moitos
aspectos as mulleres. Polo tanto, somos diferentes, pero aspiramos á
igualdade. Non é incompatible, os homes tamén o son, diferentes,
pero están case sempre por riba. É unha cuestión de xustiza.
É máis, a eses críticos que falan de cine feminino con
tanta desidia, habería que explicarlles que no momento que categorizan
están creando por contraposición o cine masculino, pero, existe
iso?
En positivo, diremos que todas esas capacidades que precisamente esa forma de
vida durante tantos séculos conxurou a realidade das mulleres, fan que,
para ben ou para mal, teñamos un xeito particular de ver e analizar o
mundo.
Agora ben, penso que envolvendo todo iso está a suma de experiencias,
sentimentos, formas, células e átomos que te constrúen
como persoa. Sexas muller ou home, prima a esencia de cada un como suxeito.
A: Consideras que existe unha tradución na técnica desa perspectiva?
Non sei tomando como exemplo Sofia Coppola, ou Iciar Bollaín, Laura Mañá.
O seu punto de vista á hora de dirixir é particular, pero saberiamos
simplemente a través dos seus filmes que quen está detrás
da cámara é unha muller?
SR: Hai diversas formas de situarse, pode ser unha persoa que expón
o seu mundo interior e a súa visión das cousas e ademais é
muller, como unha directora de cine, artista ou científica, ou pode ser
unha muller consciente da súa condición e preocupada polo seu
xénero, tratando de explicar problemas propios das mulleres dende a súa
tribuna. Son cousas distintas e as dúas son válidas.
Non creo que haxa técnicas propias das mulleres, a técnica é
independente dos xéneros, está aí e adaptámola ás
necesidades. Si que ás veces adiviñas un xeito de ver o mundo
case por identificación máis que por análise. No caso destas
tres directoras, as dúas primeiras teñen ademais un lado forte
e nítido que os máis casposos tacharían de perigosamente
masculino.
Creo que unha das claves na que estas tres mulleres coinciden é o que
dicía ao principio, a actitude: interiorizar a igualdade aínda
que do mundo exterior nos chegue outra onda.
A: Igualmente hai xéneros practicamente intocables para as mulleres
como o trhiller, o terror, a ciencia ficción… e sen embargo seguro
que existe un público tanto masculino como feminino ávido do mesmo…,
pode ser que o feito de que case ningunha muller se atreva con eses xéneros
os dirixan case sempre cara unha audiencia masculina?
SR: Mira, eu non reflexionara sobre isto en concreto e ocórreseme que
sendo xéneros moi específicos necesitan de moita produción,
é dicir, moitos cartos e as produtoras tremen ante a perspectiva de colocar
tanta pasta en ideas de mulleres. Pero pode haber aínda unha explicación
máis inquietante, pode ser que ás mulleres non nos interese tanto
cravar coitelos, sacar do ventre un alien ou atravesar un vampiro cunha motoserra.
Dende logo, non nos vemos con claridade á hora de salvar o mundo nós
soas coa axuda dun coche que fala nin temos tan á flor da pel a necesidade
de facer coincidir once coches da policía nunha esquina. Non quere dicir
que non teña que haber mulleres nestes xéneros. É máis,
vou investigar que pasa realmente.
A: En relación co anterior, se ben é certo que eses son xéneros
que gozan de moito éxito entre a xente nova, consideras que os gustos
femininos cambian malia que practicamente a nosa infancia estea inzada dos mesmos
estereotipos (barbies vs. X-Men)?
SR: Creo que a estrutura narrativa dominante segue sendo, infelizmente, dominante.
Penso que se pode alterar na medida en que cada vez máis xente utilice
a tecnoloxía de xeito crítico e construtivo, colocándose
fronte ao noso particular eixe do mal. Xa sei que é facil falar, pero
mira… se me falas da Barbie, por poñerte un exemplo, a Xurxo Éstevez,
que sempre mira o mundo dende o outro lado, coñecino na facultade, como
quen di, electrocutando a unha Barbi. Era un exercicio de deseño e alí
todos fixemos sillas para a boneca máis ou menos aparatosas ou glamurosas.
El sentouna nunha silla de metal, enfrascoulle un casco con cables, encadrouna
nunha cámara e cando lle deu ao interruptor, todos vimos por unha pantalla
de TV como se fundía a Barbie que tiñamos derreténdose
diante das narices. Asistimos a unha pena de morte en directo e en diferido,
mentres a montaxe de vídeo nos daba as cifras das execucións e
condenas en USA, o país que creara a boneca. Foi unha das mellores cousas
que vin na facultade naqueles tempos e, sen dúbida, das que máis
me fixeron reflexionar e situarme fronte a algunhas cousas e cuestionarme a
narrativa dominante.
A: Ultimamente todo pode parecer xa alcanzado, máis fácil, o
machismo menos evidente ou o feminismo unha loita desfasada…, pero claro
despois pretendes ser astronauta, soldadora ou directora de cine e que atopas?
SR: É verdade… unha grande mentira percorre Europa…, non,
en serio. Para nada está a situación normalizada. É estratexia,
covardía, máis do mesmo… Non o digo eu porque sexa muller.
Nin o di Zapatero cando fai unha lei de igualdade ou coloca a unha embarazada
fronte ás forzas armadas e corren ríos de tinta…
A realidade está na experiencia do cotián e a desigualdade percíbea
calquera, home ou muller cun mínimo de sentido da xustiza.
Pero todo isto ten, coma sempre, un lado bo: que as mulleres non quedamos paradas
esperando a que nos resolvan o problema. Xa hai séculos que collemos
as cordas do noso destino e, as máis, somos activas, traballadoras e
entusiastas e temos conseguido grandes cousas e aínda quedan unhas cantas.
Afortunadamente tamén se suman homes que comparten esta perspectiva.
Penso que ?sobre todo? temos que ser conscientes do noso lugar no mundo, e cada
vez o somos máis. No camiño, sufrimos, pero tamén temos
aprendido, avanzado, aportado e reflexionado moito.
|