Concha Castroviejo
«A
aínda moza Concha Castroviejo», que dicía Borobó,
tiña 44 anos e correra bastantes aventuras antes de volver á
súa cidade natal, Compostela, desde o afastado México, onde
chegou exiliada en 1939, como tantos milleiros de republicanos tras a derrota
na guerra civil.
Nacera en 1910 no seo dunha familia acomodada, culta e de forte relixiosidade.
Teimou en realizar estudos de bacharelato e ir á universidade, pese
á oposición do pai, catedrático da mesma.
Rebelouse, nisto e noutras cousas. Aliñouse cos republicanos e mesmo
foi testemuñar a favor de Paco Comesaña —o Daniel da Barca
de O lapis do carpinteiro— no xuízo sumarísimo que se
seguiu contra el por comunista e alterador das masas, en decembro de 1936,
en Compostela, e para o que pedían pena de morte; conseguiu saír
de Santiago e Galicia a comezos de 1937. No inverno de 1939 chegou a Francia
co grande éxodo que fuxía da derrota e das tropas franquistas.
Desde Bordeos, en xuño de 1939, embarcou para México, onde pasou
dez anos até que decidiu volver coa súa filla de 8 anos, María
Antonia Seijo. Arribaron ao peirao da Coruña en decembro de 1949.
A comezos de 1951 estaba traballando en La Noche, o xornal vespertino de Compostela
dirixido por Goñi, xunto a Borobó, Olano… Asinaba tamén
como Asela. Fixo os cursos que convocaba a Escola Oficial de Periodismo, dependente
da Dirección General de Prensa, para obter o título que a acreditase
para o exercicio da profesión, que desde setembro de 1953 exercería
no diario Informaciones de Madrid e, posteriormente, en Hoja del Lunes e na
axencia EFE.
|